ხელშეკრულების ხელმოწერის ცერემონია

2020 წლის 18 დეკემბერს ონლაინ რეჟიმში ხელი მოეწერა სამმხრივ შეთანხმებას 2021 წელს ქალაქ ქუთაისში ევროპის საბჭოს კულტურული მარშრუტების რიგით მეათე საკონსულტაციო ფორუმის გამართვასთან დაკავშირებით. საქართველოს მხრიდან ხელშეკრულებას ხელი მოაწერეს განათლების მეცნიერების, კულტურისა და სპორტის მინისტრის მოადგილემ ლევან ხარატიშვილმა და ქ. ქუთაისის მუნიციპალიტეტის მერმა იოსებ ხახალეიშვილმა, ხოლო ევროპის საბჭოს მხრიდან კულტურული მარშრუტების გაერთიანებული წილობრივი შეთანხმების აღმასრულებელმა მდივანმა სტეფანო დომინიონიმ.
 
ხელმოწერის ცერემონიას საპატიო სტუმრის რანგში ესწრებოდა ევროპის საბჭოს ოფისის ხელმღვანელი საქართველოში ნატალია ვუტოვა.
 
2021 წლის 29 სექტემბერიდან 1 ოქტომბრამდე ქ. ქუთაისი ფართომასშტაბიან საერთაშორისო ფორუმს უმასპინძლებს. საკონსულტაციო ფორუმი წარმოადგენს ევროპის საბჭოს კულტურული მარშრუტების ქსელების ოპერატორების, კულტურული მემკვიდრეობისა და ტურიზმის საერთაშორისო ორგანიზაციების, ადგილობრივი და რეგიონული ხელისუფლების, სამოქალაქო საზოგადოებისა და კერძო სექტორის წარმომადგენელთა ყოველწლიურ შეხვედრას ტურიზმის, მემკვიდრეობისა და კულტურის სფეროში. იგი კულტურული მარშრუტების ღონისძიებების პროგრამის ყველაზე მნიშვნელოვანი მოვლენაა.